Група Wezdensky
Групата Wezdensky е неформална група, формирана во јули 2009 година во Струга. Дејствува на полето на културата во контекст на особеностите на град Струга, а во релација со современите пристапи на уметноста. Нејзината главна цел е подигање на уметноста и културата, кои од година во година, се повеќе биваат затрупана во калта на политиката и малограѓанштината. Групата вклучува активности од поширокиот уметнички спектар.
Основачи на групата Wezdensky се: Ненад Јолдески, Тина Тодороска Петреска, Ѓорѓи Крстески, Светле Нестороска, Горан Ристовски и Никола Матоски.
Првата продукција на групата беше „Ајштајновите сништа“ (2009) – адаптација на делото на Ален Лајтман, одржана во јули, 2009 година во кафе „Калабалак”.
Вториот продукт на групата беше култната „Инсомниа“ на Димитрие Дурацовски (2010). Претставата беше изведена на Летната културна сцена при домот на културата „Браќа Миладиновци“ во Струга и тоа во режија на Климент Попоски, сценарио на Ненад Јолдески, продукција на Тина Тодороска Петреска и сценографија на Климентина Јаулеска. Во претставата играа 14 актери. Инсомниа беше адаптирана како претстава во кратки резови кои го следеа автофиктивниот живот на Дурацовски преку кој главен акцент беше ставен на провинцијата, маргините и на тоа како еден мал град како Струга успева да опстои во денешниот свет. Претставата „Инсомниа“, како и самата книга, претставуваше еден постмодерен колаж кој го следеше инсомничниот свет на авторот во период од една година.
Годината 2011 група Wezdensky ја постави театарската адаптацијата на извонредниот расказ на Данил Хармс „Старица“ на сцената при Центарот за култура „Браќа Миладиновци” во Струга. Во оваа претстава една ужасна и одвратна старица има чудна власт над главниот јунак. Така и започнува неговиот реален кошмар преплетен со таинствени исчезнувања, несреќни случки, гротескни слики, неверојатни настани и различни апсурдни ситуации.
Улоги: Пеце Клечкароски, Анастас Гоџоски, Мартина Димиќ, Сања Котевска, Христијан Томаноски, Бисера Јованоска, Илија Димоски, Боро Јакимоски и Горан Ристовски.
Адаптација: Ненад Јолдески
Сценографија: Ѓорѓи Крстески
Режија: Ѓорѓи Крстески и Ненад Јолдески
Станете фан на група Wezdensky!!!
